Entidat Públiko Boneiru i Bonaire Properties NV ta sera Akuerdo di Intenshon

Kralendijk, 31-01-2022

Entidat Públiko Boneiru i Bonaire Properties NV ta bai investigá e posibilidat pa bai desaroyá e anterior plantashi Bolivia i konbertié den un finka kaminda tin espasio pa naturalesa, biba i traha. Pa esaki ámbos partido a firma un akuerdo di intenshon.

Bonaire Properties, doño di e área, ke desaroyá un parti chikitu pa konstrukshon di bibienda, agrikultura i hortikultura i ekoturismo. Den e 90% ku ta sobra lo rekuperá naturalesa kaminda esaki ta nesesario i poné bou di maneho profeshonal. E puntonan di salida di e plan ta kuadra ku maneho di Entidat Públiko Boneiru. Deseo di Kolegio Ehekutivo ta pa – ku konservashon di naturalesa i kultura – promové  prosperidat i bienestar di poblashon lokal pa medio di krea sufisiente empleo, bibienda pagabel i mas produkshon lokal di bèrdura i fruta.

Den e aña tras di lomba riba nivel atministrativo a hiba konsulta intensivo entre Entidat Públiko Boneiru i Bonaire Properties, entre otro pa inventarisá kua  legislashon i regulashon mester kumpli kuné. Esaki a kondusí na un vishon di desaroyo urbano i di paisahe ku lo keda prosesá durante e lunanan binidero bou di supervishon di un grupo di direkshon konhunto. Espektativa ta ku den e simannan binidero por duna un presentashon na Konseho Insular, kaminda lo presentá un plan preliminar di desaroyo. Despues di esei lo duna informashon na un públiko mas amplio.

Despues ku e plan di desaroyo, tambe a base di input di e presentashon na Konseho Insular, a haña su forma definitivo i a stipulá su faktibilidat, teniendo kuenta ku e proseduranan preskribí lo prepará toma di desishon formal relashoná ku e plan di zonifikashon.

Gezaghèber Edison Rijna: ‘A base di e dokumentashon i e kòmbersashonnan a bira bon kla pa nos ku no solamente ta atendé sumamente profeshonal ku e proyekto, pero tambe ku nan ta anda ku rèspèt pa Boneiru su interesnan. E último akí ta determinante pa nos wisio final.’

Direktor di Bonaire Properties Mieke Breemhaar: ‘Pa hopi dékada kaba a deskuidá Bolivia. Naturalesa ta menasá di bai kompletamente pèrdí pa motibu di kabritu ku ta kome e vegetashon i pa motibu di eroshon. Pa medio di desaroyo di un parti chikitu por salba e bunita pida Boneiru akí i na mes momentu nos ta kontribuí na solushon di algun problema agudo, manera eskases di bibienda pagabel, un oferta turístiko mas diverso, enseñansa i redukshon di e dependensia di importashon di produktonan di agrikultura i hortikultura. Nos tin tur konfiansa ku huntu ku Entidat Públiko Boneiru nos ta yega na un plan bon balansá.’

Diputado James Kroon: ‘Mi ta aploudí e inisiativa akí pa motibu ku un desaroyo responsabel di Bolivia ta duna espasio pa plama e preshon ku ta eksistí awor akí riba Kralendijk na un mihó manera riba Boneiru, pa fortifiká Rincon i pa mantené e balornan importante di naturalesa. Na un manera kuidadoso ta duna forma na e proseso, pa asina nos tur i e generashonnan di futuro por disfrutá hopi di e parti balioso akí di Boneiru.’

Diputado Hennyson Thielman: “ E plan tin awor un bon balansa entre kon konservá naturalesa i traha kasnan nobo ku lo kontribuí na e nesesidat na bibienda ku tin riba e isla.” Diputado Nina den Heyer: ‘Importante ta ku banda di atenshon pa protekshon di naturalesa i desaroyo ekonómiko, tin atenshon tambe pa e skarsedat di bibienda pagabel ku nos habitantenan por hür òf kumpra. Afortunadamente a inkluí esaki tambe den e plan. Mas aleu nan a primintí tambe ku na momentu di ehekushon di konstrukshon, forsanan laboral lokal ku ta disponibel ta haña preferensia.’