Boneiru
Datonan importante
Grandura di Boneiru ta 294 km2 i ta situá 12*11 grado latitut nort i 68*15 grado longitut wèst di e parti sur di laman Caribe. E distansha entre kosta di Venezuela, Kòrsou i Aruba ta respektivamente mas o menos 70, 50 i 150 km. Distansha entre kapital di Boneiru, Kralendijk, i Amsterdam ta 7.796 km. E parti di mas haltu di Boneiru ta na e seru yamá Brandaris (241 m). Na parti nòrt tin e establisimentu di mas bieu, ku ta e bario di Rincon. Klein Bonaire, situá pabao di Boneiru, no ta poblá.
Parkenan Nashonal
Di aña 2010 te ku 2021 e poblashon di Boneiru a krese di 16.000 te pa 22.000. CBS (Centraal Bureau voor de Statistiek) ta kalkulá ku na aña 2030 e poblashon lo yega té 27.000.
E idioma ofisial ta hulandes. Sinembargo tur boneriano ta papia papiamentu na kas. E moneda ta dollar amerikano. E produkto nashonal bruto ta mas o menos $ 430.000.000,–. Turismo ta e pilá ekonómiko mas importante. 130.000 turista di estadia i 480.000 pasahero di krusero pa aña.
Sálu ta e produkto mas importante di eksportashon. Boneiru ta konta ku dos parke nashonal: Washington-Slagbaai i Marine Park. Marine Park ta kubri tur e laman rònt di Boneiru i Klein Bonaire
Bolivia
Herensia kultural balioso
Riba e tereno di ex-Plantashi Bolivia, pasado ta topa futuru. Ainda por topa rastronan di e promé habitantenan di Boneiru.
Mas o menos 3600 aña pasá indjannan a yega Boneiru den nan kanoa. Sentenares di inskripshon den diferente kueba ta prueba di nan presensia. E habitantenan original di Boneiru a keda ekspulsá despues ku Spaña na 1499 a aneksá e isla.
Produkshon di sálu
Na aña 1636, West Indische Compagnie, a eksplotá e saliña di sálu i eksportá e produkto aki pa Hulanda pa e.o. e fábrika di salamentu di haring. Riba otro parti di Boneiru a krea plantashinan impresarial pa entre otro produsí karbon. Pa esaki a sakrifiká parti grandi di mondi.
Despues ku a abolí sklavitut na 1863, Plantashi Bolivia a bin den man di un famia boneriano.Tabata uza e área prinsipalmente pa agrikultura i krio di bestia e.o. kabritu ku tabata ser eksportá pa Korsou.
Salbaguardiá e lugá
Fin di aña 1960 e tereno a bai pa gran parti den man di invershonistanan merikano. Esakinan sinembargo no a interesá pa desaroyá e plantashi di moda ku kabritu i buriku a probechá di esaki butando ku e área a wòrdu deskuidá i eroshoná.
Na final di aña 2019 e impresario Meine Breemhaar a kumpra e antiguo plantashi ku e intenshon pa salba esaki di un ruïna total. Señor Breemhaar kier logra esaki dor di entre otro restourá e muraya di katibu i e edifisionan monumental ku aktualmente ta un ruina, Alavez señor Breemhaar kier kontribuí pa aliviá e skarsedat di bibienda i promové e agrikultura lokal p’asina redusí e dependensia di importashon kostoso.
Historia
Pa tene e historia di e plantashi bibu, ta studiando e posibilidat si un di e konstrukshonnan riba e ex-plantashi por wòrdu restourá, pa sirbi komo sentro di informashon.
Banda di esei ta dedikando atenshon na e balor archeológiko di e área, manera e inskripshonnan di indjan den e diferente kuebanan di hopi siglonan bieu. E intenshon ta pa organisá kaminata bou di un guia kende lo konta historia di e ex-plantashi i splika e diversidat biológiko uniko di e área.
